Back

ⓘ Muhammad Isa Anshary




Muhammad Isa Anshary
                                     

ⓘ Muhammad Isa Anshary

Muhammad Isa Anshary adolah pajuang kamardekaan, politisi sarato tokoh Islam Indonesia. Baliau pernah manjabat sabagai katua umum Pasatuan Islam, anggota konstituante, sarato juru bicaro Partai Masyumi pado era 1950-an. Kapiawaiannyo dalam bapidato jo mampangaruahi massa, mambuek baliau dijuluak-i sabagai "singo podium".

                                     

1. Biografi

Isa Anshary adolah putra Minangkabau nan sajak ketek dididik dalam lingkuangan nan religius. Disampiang mampalajari ilimu agamo dari kaduo urang tuonyo, baliau-pun manimbo ilimu di surau. Katiko remaja baliau giat di babagai organisasi kaislaman, diantaronyo Muhammadiyah, PSII, Pasatuan Pamuda Rakyat Indonesia, sarato Indonesia Baparlemen.

Pado umua 16 taun, sasudah manyalasaian pandidikannyo di madrasah Islam, Isa marantau ka Banduang untuak maikuti babagai kursus ilmu pangatahuan umum. Di Banduang pulo, baliau mampalaweh cakrawala kaislamannyo dalam Jamiyyah Persis sampai manjadi katua umum Persis. Tampilnyo Isa Anshary sabagai pucuak pimpinan Persis dimulai pado 1940, katiko baliau manjadi anggota hoofbestuur Pimpinan Pusek Persis. Taun 1948, baliau malakuan reorganisasi Persis nan mangalami kevakuman sajak maso pandudukan Japang jo Parang Kamardekaan. Taun 1953 hinggo 1960, baliau tapiliah manjadi katua umum Pusekt Pimpinan Persis.

Salain sabagai mubaligh, Isa Anshary dikana pulo sabagai panulih nan tajam. Baliau tamasuak salah surang parancang Qanun Asasi Persis nan alah ditarimo sacaro bulek dek Muktamar V Persis 1953 lalu disamparonoan pado Muktamar VIII Persis 1967. Dalam sikap jihadnyo, Isa Anshary maanggap pajuangan Persis sungguah vital sarato kompleks, karano manyangkuik babagai bidang kahidupan umaik. Dalam bidang pambinaan kader, Isa Anshary manakanan pantiangnyo sabuah madrasah, tampek mambina kader-kader mudo Persis. Sumangaiknyo dalam hal pambinaan kader indak pernah padam maskipun baliau mandakam dalam tahanan Orde Lamo di Madiun. Kapado Yahya Wardi nan manjabat katua umum Pimpinan Pusek Pamuda Persis pariode 1956-1962, Isa Anshary mangiriman naskah "Ranuangan 40 Taun Pasatuan Islam" nan baliau susun dalam tahanan untuak disebaan kapado pasarato muktamar dalam rangko maningkek-an kasadaran jamaah Persis. Malalui tulisannyo, Isa Anshary mancubo mahiduik-an sumangaik para kadernyo dalam usaho mangambangan sarato manyebaan agamo Islam sarato pajuangan organisasi Persis. Dalam mampajuangan tagaknyo syariat Islam di Indonesia, Isa mamiliah bajuang malalui parlemen. Malalui Partai Masyumi, baliau konsisten mampajuangan syariat Islam manjadi dasar-dasar negara.

                                     

2. Karya

  • Inilah Partai Masyumi 1954
  • Sebuah Manifesto 1952
  • Islam dan Kolektivisme 1941
  • Bahaya Merah Indonesia 1956
  • Manives Perjungan Persatuan Islam 1958
  • Ke Depan Dengan Wajah Baru 1960
  • Barat dan Timur 1948
  • Umat Islam Menentukan Nasibnya 1961
  • Partai Komunis Indonesia PKI, Pembela Negara Asing 1955
  • Umat Islam Menghadapi Pemilihan Umum 1953
  • Mujahid Dakwah 1966
  • Tugas dan Peranan Generasi Muda Islam dalam Pembinaan Orde Baru 1966
  • Pesan Perjuangan 1961
  • Islam dan Nasionalisme 1955
  • Falsafah Perjuangan Islam 1949
  • Tuntunan Puasa 1940
  • Islam Menghadapi Pemilihan Umum 1953
  • Pegangan Melawan Fasisme Jepang 1942
  • Islam dan Demokrasi 1938
  • Islam Menentang Komunisme 1956
  • Bukan Komunisto Fobi, tapi Keyakinan Islam 1960