Back

ⓘ Suku Caniago




                                     

ⓘ Suku Caniago

Suku Caniago adolah suku nan dibuek dek Datuak Parpatiah Nan Sabatang nan marupokan salah satu suku induak di Minangkabau salain suku Koto, suku Piliang, jo suku Bodi. Suku Chaniago iyolah suku asli atau pribumi di Minang mamiliki falsafah iduik demokratis, iyolah jo manjunjaung tinggi falsafah bulek aia dek pambuluah, bulek kato dek mufakat. Nan bulek samo digolongkan, nan picak samo dilayangkan ". Dek hal itulah mangko pado masyarakaik suku Chaniago sadoalah kaputusan nan ka diambiak untuak suatu urusan musti malalui suatu proses musyawarah untuak mufakaik.

Falsafah tasabuik tacamin pulo pado bantuak arsitektur rumah adaik Bodi Chaniago nan ditandoi jo indak adonyo anjuang pado kadua sisi bangunan Rumah Gadang. Hal tasabuik manandokan baso tingkek kasta urang indak mambuek pabedaan palakuan antaro nan tinggi jo nan randah. Hal nan mambedakan tinggi randahnyo sasaurang pado masyarakaik suku Chaniago hanyolah dinilai dari gadangnyo tangguang jawek nan dipikua dek urang tasabuik.

Salah satu falsafah lain untuak mancari kato sapakaik dalam maambiak kaputusan pado suku Chaniago adolah aia mambasuik dari bumi aratinyo suaro nan musti didangakan adolah suaro nan datang dari bawah atau suaro itu adolah suaro rakyaik ketek, baru kudian dirapekkan dalam sidang musyawarah untuak mandapek sabuah kato mufakaik barulah pimpinan tatinggi baiak rajo maupun pangulu nan manatapkan kaputusan tasabuik.