Back

ⓘ Pulau Sebuku (Sumatera)




Pulau Sebuku (Sumatera)
                                     

ⓘ Pulau Sebuku (Sumatera)

Pulau Sebuku adolah pulau ketek nan talatak di Selat Sunda antaro pulau Sumatera jo pulau Jao. Sacaro administratif, pulau ko masuak ka Kabupaten Lampung Selatan, Lampung. Basamo jo Sebesi, Sebuku juo dijadikan tujuan raun bahari.

                                     

1. Sijarah

Pado taun 1883 Gunuang Krakatau malatuih inggo manyababkan tsunami di Selat Sunda. Pulau Sebuku nan talatak di utara takanai lamun ombak tsunami inggo manyapu kampuang nan panah ado di situ. Manuruik laporan pamarintah kolonial, tsunami tasabuik manewasan 150 urang.

Pado taun 1970, pulau ko dijadikan tampek baparak jo baladang. Parak karambia jo ladang pisang manjadi andalan di pulau. Hal iko mambuek utan Pulau Sebuku manjadi bakurang.

Pado taun 1999, ditamukan bangkai kapa nan dipunyoi Japang. Panamuan ko dikatauai dek balansuangnyo festival fotografi bawah lauik. Umua kapa nan tabanam tasabuik alun dikataui pasti.

Pado Desember 2018, tajadi erupsi Gunuang Anak Krakatau nan manyababkan tsunami jo galombang tinggi di Selat Sunda. Hal iko mambuek panduduak Pulau Sebuku diungsikan ka Pulau Sumatera. Ado puluahan urang nan diungsikan dari Pulau Sebuku.

                                     

2. Geografi

Pulau Sebuku marupokan pulau nan talatak di Taluak Lampung agak ka timur jo kiro-kiro 2.5 km utara Pulau Sebesi sarato 2.3 km selatan Pulau Sumatera. Pulau Sebuku tabantang salaweh 17.71 km 2. Sacaro administratif marupokan dari Kabupaten Lampung Selatan, Lampung.

Pulau Sebuku tasusun dari batu-batu andesit. Hal iko manunjuakan baso asa mulo pulau ko takaik jo riwayaik volkanologi di Selat Sunda. Pada sisi utara pulau, banyak tasasun dek koral-koral fosil, lumpua, jo pasia, sadangkan pado sisi timur pulau banyak tasusun dari lumpua, pasia, karekel, sarato koral-koral fosil. Di sakaliliang pulau, dibatasi jo terumbu-terumbu karang.

                                     

3. Ekologi

Sajak erupsi gadang dari Gunuang Krakatau taun 1883, ekosistem di pulau-pulau sakuliliangnyo barubah. Pulau Sebuku manjadi salah satu pulau nan takanai dampaknyo. Banyak panaliti nan mangkaji parubahan alam jo karagaman hayatinyo. Alam Sebuku agak babeda jo pulau-pulau sakaliliangnyo dek dipakai manjadi parak jo ladang dek masyarakaik, sainggo jumlah rimbo nan adopun tingga saketek sarato karagaman alamnyo nan kurang. Pado taun 2005 dilaporkan ado ampek spesies samuik jo karanggo nan ditamukan. Jumlah ko labiah saketek daripado nan ado di Sebesi atau Krakatau.

Ado banyak spesies ramo-ramo nan tasuo. Sebuku basamo Sebesi marupokan tampek singgah migrasi antaro Sumatera jo Jawa. Sebuku mampunyoi banyak nan jinih ramo-ramo Jawa daripado ramo-ramo Sumatera, walau sacaro wilayah labiah dakek ka Sumatera.

Hutan bakau masih dapek tasuo di sisi timur pulau mambantang dari utara inggo selatan pulau. Di tiok suduik pulau punyo dominasi jinih bakau nan babeda auik rami ditumbuahi pohon bakau Rhizophora apiculata, sadangkan di bagian agak ka darek banyak tasuo Exoecaria agallocha. Samantaro di selatan ditumbuahi juo Exoecaria agallocha sarato Lumnitzera raemosa jo Sonneratia ovata.

Sebuku nan marupokan pulau nan talatak di sisi lua Taluak Lampung mampunyoi kondisi terumbu karang nan babeda jo pulau-pulau di sisi dalam Taluak Lampung nan labiah dakek Sumatera. Sebaran terumbu karang di Sebuku condong sampik sainggo binatang lauik indak baitu baragam. Bahan panyusun pantai di sisi utara condong pasia karang jo pasia lumpua nan ditumbuahi tumbuahan-tumbuahan lauik dangka. Samantaro pado sisi timur pulau banyak tasuo spesies bulu babi Diadema setosum, nan manjadi panando adonyo karusakan terumbu karang. Karagaman binatang lauik sarupo bulu babi di Sebuku condong langka dibandiang pulau lainnyo.



                                     

4. Raun

Pulau Sebuku tanamo sabagai tujuan raun untuak wisata aia sarupo snorkelling atau manyilam lauik. Turis-turis biasonyo manyubarang jo sampan laju dari Desa Candi di Sumatera.

                                     

5. Rujuakan

Daftar pustaka

  • Asfiya, Wara; Ubaidillah, Rosichon; Yamane, Seiki 2008. "Ant Hymenoptera: Formicidae of the Krakataus, and Sebesi and Sebuku Islands" PDF. Treubia. 36: 1–9. Diarsipkan dari versi asli PDF tanggal 7 October 2011. Diakses tanggal 6 July 2011.
  • Darsono, Prapto; Aziz, Aznam. "Khinodermata dari Beberapa Pulau di Teluk Lampung, Lampung, Sumatera" PDF. Lembaga Ilmu Pengetahuan Indonesia. Diarsipkan dari versi asli PDF tanggal 25 April 2012. Diakses tanggal 6 July 2011.
  • Barber, A. J.; Crow, M. J.; Milsom, J. S., eds 2005. Lonely Planet: Indonesia. Bath, United Kingdom: The Geological Society Publishing House. ISBN 1-86239-156-4.
  • Touwen, Jeroen 2001. Extremes in the archipelago: trade and economic development in the Outer Islands of Indonesia, 1900–1942. Leiden: KITLV press. ISBN 90-6718-159-5.
  • Vaisutis, Justine 2007. Lonely Planet: Indonesia. Lonely Planet. ISBN 1-74104-435-9.